Oportunidá d'oru para celebrar el 98 aniversariu per tolo alto. El Real Oviedo, tres una xornada de festexu, víase les cares nel Carlos Tartiere col Villarreal B nun choque clave para el carbayones nel so oxetivu por averase a los puestos altos de la tabla. Con una gran entrada nel municipal uvieín, el Real Uviéu salía al alcuentru formando'l siguiente once: Leo Román, Oier Luengo, Dani Calvo, Viti, Abel Bretones, Colombatto, Luismi, Sebas Moyano, Masca, Cazorla y Alemão.
El partíu nun pudo empezar meyor para los de la capital del Principáu y ye que nel minutu 5, Alemão adelantró a los de Carrión con un bon tantu tres una perda del combináu visitante en salida de balón. L'alcuentru poníase bien de cara para los nuesos anque'l pasu de los minutos fixo que los de Miguel Álvarez fueren ganando presencia en campu contrario y apoderando na medular.
El Real Oviedo aguantó les llegaes del submarín mariellu y buscó el segundu anque una acción desafortunada en cantu del descansu supunxo l'empate visitante. El VAR llamó al colexáu por una mano d'Abel Bretones y tres dellos minutos d'espera l'árbitru indicó penalti. Ontiveros nun perdonó dende los once metros y el 1-1 yera una realidá.
La primer metá entraba nel descuentu y Alemão con un golazu volvió desamarrar la llocura nel Carlos Tartiere. Pase sensacional de Viti dende la derecha ya impecable remate del brasileñu para superar a Iker Álvarez y poner el segundu.
Na segunda metá, el Real Oviedo nun cesó en buscar el terceru col que sentenciar el choque y fueron delles les ocasiones que tuvieron los de Luis Carrión. Masca de tacón a puntu tuvo d'anotar un golazu pero l'acción, que taba invalidada per fora de xuegu, foi detenida pol meta del Villarreal B. Álex Millán, Seoane y Dubasin ingresaron al campu na segunda metá para enfrescar al equipu y sería precisamente'l delanteru centru quién tendría la más clara de los segundos 45 minutos.
Una gran intervención de Leo Román estenó'l peligru n'unu de los aceleríos del filial del submarín mariellu hasta que na recta final Álex Millán tendría la sentencia. El "19" tuvo'l terceru nun mano a mano pero'l so disparu colar por pocu ente que Dubasin esperaba'l pase para emburriar el balón a puerta vacía. Magar ello, el Real Oviedo aguantó y aguantó para sumar una victoria clave na so llucha pol ascensu y nun día bien especial para l'uvieísmu.
